Ekkert verið rætt við Seðlabanka Evrópu

Ekki hefur verið farið í viðræður við Seðlabanka Evrópu um aðstoð við að koma á eðlilegum markaði með íslensku krónuna.

Gylfi Magnússon viðskipta­ráðherra hefur sagt að þetta ætti að gera samfara ESB-aðildar­umsókn. Hann telur að þannig megi liðka fyrir því að gjaldeyrishöftum yrði aflétt og ákvæði EES-samningsins uppfyllt. Hins vegar sé ekkert að frétta af slíkum viðræðum. „Ég reikna með því að þetta verði skoðað í haust eða snemma vetrar, en það er ekki komið á það stig enn þá," segir hann.

Spurður hvort málið sé stopp hjá stjórnvöldum segir Gylfi: „Já, það má eiginlega segja. Við myndum hafa frumkvæði að þessu, og ég reikna fastlega með því að það verði gert, en það þarf auðvitað að stilla upp óskum okkar og rökstuðningi áður en farið er af stað með það."

Gylfi vill engri tímasetningu lofa, um hvenær gengið verði í málið.

Seðlabanki Íslands gerir nú ráð fyrir að gengi krónunnar verði um 176 krónur gagnvart evru út árið, sem er rúmlega átta prósentum lægra gengi en spáð var í maí.

„Ef krónan fer að lækka miklu meira verður erfitt fyrir fólkið í landinu að halda áfram," segir Svava Johansen, jafnan kennd við 17, sem telur þó að krónan sé komin á botninn. „Áður þótti verðmætt að fá greiðslufrest en það getur í dag virkað öfugt, ef gengið fellur í millitíðinni. Við höfum því snúið okkur að því að borga vöruna fyrir fram."

Ólafur Ísleifsson, lektor í hagfræði við HR, segir trúverðugleika krónunnar aukast með góðum fréttum, svo sem þegar niðurstaða er fengin um Icesave.