Grænfriðungar grípa til aðgerða gegn botnvörpuveiðum

Grænfriðungar sökkva nú stórgrýti innan fiskveiðilögsögu Evrópusambandsins til að koma í veg fyrir það sem þeir kalla skaðlegar fiskveiðar.

Samtökin koma til með að sleppa 180 grjóthnullungum úti fyrir ströndum Svíþjóðar og Danmerkur til að skemma fyrir botnvörpuskipum sem veiða á svæðinu.

Grænfriðungar segja botnvörpuveiðarnar eyðileggja bæði hafsbotninn og lífríki sjávar.

Sænski landbúnaðarráðherrann Eskil Erlandsson segir þessar aðgerðir með öllu ónauðsynlegar. Í grein sem hann skrifaði í Dagens Nyheter á laugardag segir hann aðgerðirnar aukinheldur ógna samkomulagi Svía og Dana um að veiða ekki innan sameiginlegrar lögsögu sinnar í Kattegat þar sem þorskurinn hrygnir.

Staffan Danielsson, talsmaður Grænfriðunga, segir hins vegar í samtali við fréttastofu AFP að hnullungarnir, sem eru allt að þrjú tonn að þyngd, muni ekki hafa nein neikvæð áhrif á umhverfið.