Sakamálið sem skekur Banda­ríkin

Málið er kennt við Lindsay Clancy, móður sem ákærð er fyrir að hafa myrt börnin sín þrjú á meðan maðurinn hennar skaust í apótek en hún reyndi jafnframt að svipta sig lífi.

Réttarhöld standa þessa dagana yfir. Játning hennar liggur fyrir í málinu en þrátt fyrir það telja fjölmargir á samfélagmiðlum að gögn í málinu bendi til þess að hún hafi ekki getað framið voðaverkin og spyrja sig hvers vegna eiginmaður hennar hafi aldrei verið grunaður í málinu.

Lindsay hefur af nær öllum vitnum sem komið hafa fyrir réttin verið lýst sem venjulegri, umhyggjusamri móður og snúast réttarhöldin að miklu leyti um að færa sönnur á að Lindsay hafi myrt börn sín í sturlunarástandi.

Hún glímdi við fæðingarþunglyndi og hafði ítrekað reynt að leita sér hjálpar.

Óhugsandi

Inga Kristjánsdóttir, hlaðvarpsstjórnandi Illverks er ein þeirra sem fylgst hefur með málinu í beinni útsendingu. Hún telur nokkrar ástæður fyrir því að málið veki svo mikla athygli.

„Ég held að það sé í fyrsta lagi af því þetta er svo ótrúlega venjuleg móðir og fólki finnst þetta bara svo ótrúlega óhugsandi hvernig móðir getur myrt börnin sín svona í rauninni upp úr þurru. Hún hafði mörg önnur tækifæri til þess en hún sendir manninn sinn út í örstutt erindi. Ég held að fólk eigi bara einhvern veginn erfitt með að sætta sig við þá staðreynd.“

Umræða um aðgengi að heilbrigðisþjónustu

Þá telur Inga að málið veki athygli vegna þeirrar staðreyndar að margir tengi við þann raunveruleika að reyna að leita sér hjálpar vegna andlegra erfiðleika en komi oft að lokuðum dyrum.

„Ég held að þetta sé líka vegna þess að þetta er bara svo mannlegt en á sama tíma svo ótrúlega óhugsandi.“

Minnir á réttarhöldin yfir Depp og Heard

Inga segir áhuga fólks á málinu minna á réttarhöldin yfir Johnny Depp og Amber Heard sem heimsbyggðin fylgdist með límd við skjáinn.

„Síðasta svona mál er Andrea Yates málið frá árinu 2001, sem var svipað mál, móðir sem myrðir börnin sín sex. Margir líkja þessu máli við hennar mál og álíka margir að fylgjast með.“

Sjálf er Inga vakin og sofin yfir málinu og gefur út daglega hlaðvarpsþætti upp úr réttarhöldunum.

„Það má eiginlega segja að þetta sé það eina sem ég er búin að vera að gera síðustu daga, þetta og hekla yfir þessu.“