Úrskurðurinn veldur ekki stórkostlegum töfum

„Ég áttaði mig á því að þessi ákvörðun mín myndi valda titringi," segir Svandís Svavarsdóttir, umhverfisráðherra, um úrskurð sinn um Suðvesturlínu. Hún segir óeðlilegt að halda því fram að úrskurðurinn komi til með að valda stórkostlegum töfum á iðnaðarframkvæmdum á Suðurnesjum.

Svandís hefur verið gagnrýnd fyrir að hafa ákveðið í lok september að Skipulagsstofnun þyrfti að nýju að fjalla um hvort fara eigi fram sameiginlegt mat á umhverfisáhrifum framkvæmda vegna Suðvesturlínu milli Hellisheiðar og Helguvíkur og öðrum tengdum framkvæmdum.

Helgi Magnússon, formaður Samtaka iðnaðarins, segir að ákvörðun Svandísar hafi verið ólögmæt og hún trufli iðnaðaruppbyggingu á Suðurnesjum. Sjálf segir Svandís það vera afar veik rök að halda því að úrskurður sinn sé ólögmætur vegna þess að komið hafi verið fram yfir frest til að úrskurða um málið. Það hafi verið óheppilegt það en geri ekki ákvörðun sína ólögmæta. Svandís var gestur í þætti Sigurjóns M. Egilssonar á Bylgjunni í morgun.

„Það sem ég er að gera þarna er að ég óska eftir því að Skipulagsstofnun kalli eftir nánari og skýrari gögnum til að byggja sína niðurstöðu á. Það er það sem ég er að gera. Ég tek sérstaklega fram í úrskurðarorðinu, sem ég er ekki viss um að allir fjölmiðlamenn hafi lesið eða þeir sem eru að tjá sig um þennan úrskurð, að þar með er ekki tekin afstaða til efnislegrar niðurstöðu á seinni stigum," segir ráðherrann.

Svandís segir gríðarlega mörg atriði óljós þegar kemur að einstökum verkefnum á Suðurnesjum. Það eigi við um fjármögnun og hvort orka verði til staðar. Því sé óeðlilegt að halda því fram að ákvörðun sín komi til með að valda stórkostlegum töfum miðaða við aðra enda sem séu óleystir varðandi álversframkvæmdir í Helguvík.