Gerrard: Vorum ekki nógu góðir

Steven Gerrard segir að ástæðan fyrir því að Liverpool komst ekki áfram í sextán liða úrslit Meistaradeildar Evrópu er sú að liðið hafi ekki verið nógu gott í keppninni.

Liverpool kvaddi keppnina í kvöld er liðið tapaði fyrir Fiorentina á heimavelli, 2-1. Liðið var þó þegar fallið úr leik fyrir leik kvöldsins.

„Ef maður skoðar þátttöku okkar í keppninni í heild sinni vorum við ekki nógu góðir. En nú munum við reyna allt sem getum til að tryggja okkur þátttökurétt í keppninni fyrir næsta tímabil," sagði Gerrard.

„En þó svo að við vorum ekki með okkar sterkasta lið hér í kvöld fannst mér við spila ágætlega. Við vorum svolítið óheppnir að tapa leiknum í blálokin."

„Leikurinn skipti í sjálfu sér ekki máli fyrir okkur. Þetta snerist fyrst og fremst um að klára þennan leik og undirbúa okkur fyrir leikinn gegn Arsenal á sunnudag eins vel og við getum."

Það jákvæða við leikinn í kvöld fyrir stuðningsmenn Liverpool var að Ítalinn Alberto Aquilani spilaði í 76 mínútur í kvöld og Fernando Torres kom inn á sem varamaður. Hann hafði misst af síðustu fimm leikjum Liverpool vegna meiðsla.

„Hann hefur staðið sig vel," sagði Gerrard um Aquilani. „Hann á enn nokkuð langt í land hvað leikform varðar en hann er mjög góður. Hann er á sömu bylgjulengd og við hinir og ég efast ekki um að hann á eftir að reynast félaginu frábær leikmaður."