Málstaður Íslendinga styrkist í Bretlandi og Hollandi

Málstaður Íslendinga vegna Icesave málsins virðist vera að styrkjast í Bretlandi og Hollandi. Stjórnmálamenn eru sagðir mildari í afstöðu sinni og háskólaprófessorar halda íslenskum sjónarmiðum á lofti.

Bresk og hollensk stjórnvöld eru nú sögð yfirfara lög um ríkisábyrgð vegna Icesave og fyrirvara við þau. Niðurstöðunni hefur verið fagnað í breskum fjölmiðlum og í mikið lesnu hollensku viðskiptablaði segir um helgina að jákvæður tónn heyrist úr fjármálaráðuneytinu þarlenda. Neikvætt andrúmsloft gagnvart málinu virðist -hvað sem öðru líður - hófstilltara en áður.

„Það er erfitt að dæma um það en ekki erfitt að ímynda sér að svo sé í ljósi þess hvernig málið allt er vaxið," segir Ólafur Ísleifsson, lektor við Háskólann í Reykjavík.

Þrír virtir fræðimenn birtu harðorða grein á vefútgáfu hollenska dagblaðsins de Volkskrant í dag. Væna þeir hollensk og bresk stjórnvöld um skammsýni og gagnrýna þau fyrir að hygla sínum eigin borgurum og fjármálastofnunum á kostnað skuldsettra ríkja. Er þeim jafnframt borið á brýn að beita óeðlilegum þrýstingi - nánast fjárkúgun - til að ná sínu fram í gegnum stofnanir og samtök eins og Alþjóðagjaldeyrissjóðinn og Evrópusambandið.

Ekki stóð á viðbrögðum við greininni og virtist heldur bjartara yfir vefspjallinu en oft áður í sambærilegum umræðum. Enn er þó fyrir hendi þung undiralda og má greina að pólitískur dans er ákaft stiginn bæði í Bretlandi og Hollandi. Miðar hann einkum að því að fullvissa þarlenda skattgreiðendur um að peningurinn vegna Icesave skili sér tilbaka með einum eða öðrum hætti.