Jóhanna: Var ekki að setja þrýsting á Vinstri græna

Jóhanna Sigurðardóttir, forsætisráðherra, segist ekki hafa verið að setja þrýsting á Vinstri græna með því að birta greinagerð Seðlabankans og viðskiptaráðuneytisins um hvaða afleiðingar frekari tafir á endurskoðun Alþjóðgjaldeyrisjóðsins kann að hafa fyrir íslenskt efnahagslíf.

Greinagerð Seðlabankans og Viðskiptaráðuneytisins var birt á föstudag en hún var unnin að beiðni forsætisráðherra.

Í greinargerðinni er spáð öðru efnahagshruni tefjist endurskoðun Alþjóðagjaldeyrissjóðsins á efnahagsáætlun Íslands enn frekar. Lausn Icesave deilunnar er talið vera lykilatriði til að opna fyrir frekari lánveitingar.

Stjórnvöld hafa nauman tíma til að ganga frá málinu en 23. október næstkomandi þarf tryggingasjóður innstæðueigenda að greiða út tryggingar - en sjóðurinn er langt frá því að eiga fyrir skuldbindingum.

Vinstri grænir eru nánast klofnir í afstöðu sinni til Icesave samkomulagsins og hafa sumir litið svo á að forsætisráðherra væri að setja þrýsting á samstarfsflokk sinn í ríkisstjórn með birtingu þessarar greinagerðar.

Jóhanna segir af og frá að með þessu hafi hún verið að setja þrýsting á Vinstri græna. „Það er hins vegar ljóst að mér sem forsætisráðherra ber skylda til þess að láta meta áhrif á þjóðarbúið og efnahag ef að áætlun og afgreiðsla lána frá Alþjóðagjaldeyrissjóðnum dregst í langan tíma til viðbótar. Hvaða áhrif það kann að hafa á þjóðarbúið. Það var það sem ég gerði," segir Jóhanna.

Forsætisráðherra segir brýnt gengið verði frá Icesave málinu sem allra fyrst. „Við höfum mjög stuttan tíma. Það er mjög margt undir í þessu. Ég er að vona að þetta mál fari að skýrast og klárast núna í næstu viku, hálfum mánuði."

Jóhanna þorir ekki að segja nákvæmlega til hvenær frumvarpið verði lagt fram. „Ég vona að það verði sem allra fyrst. Við höfum beðið alltof lengi eftir þessu og ég vona að það verði sem allra fyrst. Ég er auðvitað mjög ósátt við það hvernig Alþjóðagjaldeyrissjóðurinn er að tengja lánafyrirgreiðslu við Icesave deiluna," segir Jóhanna.