Kraftaverkasaga heróínfíkils

Heimir Sverrisson kvikmyndagerðarmaður vinnur að nýrri heimildarmynd sem fjallar um líf götustráksins Suyash sem stofnaði meðferðarheimili í höfuðborg Nepal.

„Þetta er lítil kraftaverkasaga,“ segir Heimir Sverrisson kvikmyndagerðarmaður um heimildarmynd sem hann vinnur að. Myndin fjallar um Suyash, götustrák og fyrrverandi heróínfíkil, sem opnaði meðferðastöð í Kathmandu, höfuðborg Nepal, með hjálp frá bandarískum áfengisráðgjafa og íslenskum lækni.

„Þetta byrjaði þannig að Valgerður Rúnarsdóttir, læknir á Vogi, fór til Nepal í gegnum samtökin Recovery Without Boarders, til að aðstoða Suyash við rekstur meðferðarheimilisins. Ég frétti svo af þessum unga manni og starfi hans í Kathmandu frá vinkonu minni sem hafði sótt fyrirlestur hjá Valgerði um meðferðarheimilið og þar með var áhugi minn vakinn. Það eru um 80-100 þúsund sprautufíklar í Kathmandu og um níutíu prósent þeirra eru HIV smitaðir, þannig að þetta er stórt og mikið verkefni sem Suyash hefur ráðist í,“ segir Heimir.

Saga Suyash er að mörgu leyti ótrúleg. Fjölskylda hans rak hann á dyr þegar hann byrjaði í neyslu og í sjö ár bjó hann á skítugum götum í „Toilet“-hverfinu í Kathmandu. „Hverfið er það allra fátækasta í borginni. Þar býr fjöldi munaðarlausra barna sem mörg hver frjósa til dauða í frosthörkunum á veturna. Mansal og vændi eru stórt vandamál í landinu og HIV er orðið það útbreitt að því hefur verið lýst sem faraldri og ástandið fer versnandi ár frá ári.

Vendipunkturinn í lífi Suyash varð þegar kofinn hans brann stuttu eftir að hann hafði lent í höndunum á glæpamönnum sem höfðu ráðist á hann með sveðju. Hann hætti í neyslu en ákvað að til að ná fullkomnum bata yrði hann að hjálpa öðrum. Hann stofnaði meðferðarheimili og stuttu seinna voru tuttugu og þrír sjúklingar fluttir þangað inn til meðferðar.

Gallinn var bara sá að Suyash vissi ekki hvernig átti að fara að og leitaði hjálpar hjá Jake Epperly, áfengisráðgjafa í Chicago, sem leiðbeindi honum í gegnum bréfaskriftir.“ Síðan þá hefur meðferðarheimilið stækkað og með fjármagni og aðstoð sjálfboðaliða hefur einnig verið hægt að koma á laggirnar meðferðarheimili fyrir konur.

Undirbúningur fyrir tökur á heimildarmyndinni eru komnar vel á veg og mun Heimir halda aftur til Nepal í haust ásamt Árna Ben, hljóðmanni, og ljúka tökum. Þeim sem vilja kynna sér söguna um Suyash betur er bent á síðuna www.keepcomingbackfilm.com.

sara@frettabladid.is