Gerrard reiðubúinn að skrifa undir nýjan samning

Steven Gerrard segist aldrei hafa verið ánægðari hjá Liverpool en nú og að hann sé reiðubúinn að skrifa undir nýjan samning.

Gerrard hefur átt frábæru gengi að fagna á tímabilinu og skoraði síðast þrennu í 5-0 sigri Liverpool á Aston Villa í ensku úrvalsdeildinni

Enskir fjölmiðlar hafa verið að gera því skóna að Liverpool sé að undirbúa nýjan langtímasamning fyrir Gerrard.

„Ég hef aldrei verið ánægðari á mínum ferli en nú," sagði Gerrard í samtali við enska fjölmiðla. „Ég á tvö ár eftir af núverandi samningi mínum og ef sá möguleiki væri fyrir hendi að framlengja hann myndi ég örugglega gera það."

„Ég er hjá toppliði með leikmönnum í heimsklassa og hef trú á stjóranum .Ég er viss um að við getum náð góðum árangri í framtíðinni."

Gerrard sagði einnig að samband við Rafa Benitez knattspyrnustjóra hafi aldrei verið betra. Það var sagt vera stirt á fyrstu árum Spánverjans hjá félaginu er hann lét Gerrard spila á hægri kantinum en ekki á miðjunni eins og hann er vanur.

„Kannski var ég eigingjarn á mínum yngri árum. Ég hugsaði of mikið um sjálfan mig þegar hann lét mig spila í þessari stöðu. Ég hefði átti að staldra við og átta mig á því að þetta var fyrir liðið gert."

„En sem stendur er Benitez að leyfa mér að spila í minni uppáhaldsstöðu. Ég er fyrirliði liðsins og við erum að vinna leiki. Samband okkar hefur styrkst með tímanum."