InDefence: Indriði fer með rangt mál

InDefence hópurinn, sem talsvert hefur látið að sér kveða síðan Icesave samningaviðræðurnar komust í hámæli, segir Indriða H. Þorláksson hafa farið með rangt mál í Kastljósinu fyrr í kvöld. Þar sat hann á móti Eiríki S. Svavarssyni, lögmanni og meðlimi InDefence í viðtali um Icesave samninginn.

Indriði, sem er aðstoðarmaður fjármálaráðherra og undirritaði samninginn, fullyrti að endurupptökuákvæði Icesave samningsins væri ekki bundinn mati AGS á greiðslugetu Íslands, heldur muni íslendingar sjálfir meta greiðslugetu sína og þannig vekja upp umrætt ákvæði.

„Það er náttúrulega ekki rétt að við séum háð einhverju mati Alþjóðagjaldeyrissjóðsins," sagði Indriði í Kastljósinu.

Þegar Eiríkur benti á að það stæði í samningnum þvertók Indriði fyrir það: „Það stendur ekki í samningnum. Það stendur að ef okkar staða miðað við mat AGS á henni eins og hún var síðastliðið haust gefi tilefni til endurskoðunar. Við þurfum ekkert að fá AGS til að meta það, þetta er bara samanburður við þessa stöðu."

„Það er okkar mat sem gildir í þessu efni," sagði Indriði að lokum um þetta mál.

Í 15. grein samningsins við Hollendinga og 16. grein samningsins við Breta segir hins vegar að endurskoðunarákvæði samningsins verði virkt ef að greiðslustaða Íslands hafi versnað samkvæmt síðustu útgefnu skýrslu AGS á þeim tíma miðað við skýrslu AGS frá 19. nóvember 2008.

Orðrétt hljóðar 16. grein samningsins við Breta, sem ber yfirskriftina Change in circumstances og fjallar um endurskoðun samningsins, svona: „This paragraph '16 applies if at any time the then most recently published Article lV review by the IMF in relation to lceland states that a significant deterioration has occurred in the sustainability of the debt of lceland, relative to the assessment of such sustainability by the IMF as of 19 November 2008."

Greinin í samningi Hollendinga er áþekk.