Verður erfitt að ná Arsenal

Martin O'Neill, knattspyrnustjóri Aston Villa, viðurkennir að það verði erfitt fyrir sína menn að ná fjórða sætinu aftur af Arsenal.

Aston Villa tapaði 5-0 fyrir Liverpool um helgina en liðið hefur alls leikið fimm leiki í röð í úrvalsdeildinni án sigurs. Liðið er auk þess fallið úr leik í ensku bikarkeppninni sem og UEFA-bikarkeppninni.

O'Neill neitar þó að gefast upp og stefnir enn að því að ná fjórða sæti deildarinnar og þar með þátttökurétti í Meistaradeild Evrópu á næstu leiktíð.

„Það mætti segja að við séum ekki lengur mikil ógn við stöðu Arsenal í deildinni," sagði O'Neill í samtali við enska fjölmiðla. „Það er engin tilviljun að efstu fjögur liðin eru þar sem þau eru og að við séum í lægð."

„Við erum ekki jafn sterkir og fjögur efstu liðin. Ég hef oft sagt það áður og endurtek það nú - við eigum enn mikla vinnu eftir."

„En þetta er ekki útilokað þar sem Arsenal á marga erfiða leiki eftir. En þeir eru að fá marga menn úr meiðslum og þetta verður mjög, mjög erfitt."