Lippi: Geri ráð fyrir að Cannavaro sé klár gegn Kýpur

Landsliðsþjálfarinn Marcello Lippi hjá Ítalíu hefur engar áhyggjur af því að varnarmaðurinn og landsliðsfyrirliðinn Fabio Cannavaro verði ekki klár í næstu verkefni með landsliðinu þrátt fyrir að hafa fallið á lyfjaprófi.

Lyfjapróf sem Cannavaro gekkst undir í ágúst leiddi í ljós að hann hafði innbyrt kortisón en efnið er á bannlista. Cannavaro útskýrði að hann hafi tekið lyfið eftir að hafa verið stunginn af geitungi og sjúkrateymi Juventus staðfesti það.

Lippi segir málið hafa verið blásið upp í fjölmiðlum og á ekki von á öðru en að hann mæti aftur til undirbúnings fyrir leikinn gegn Kýpur í undankeppni HM 2010 á miðvikudag en Cannavaro tekur út leikbann gegn Írum á morgun.

„Þetta mál er úr sögunni núna frá mínum bæjardyrum séð og ég geri ráð fyrir því að Cannavaro hitti okkur á sunnudag fyrir undirbúning fyrir leikinn gegn Kýpur á miðvikudag," sagði Lippi á blaðamannafundi í dag.