Enn vandræði hjá Newcastle - Profitable Group hættir við kaup

Það ætlar vægast sagt að ganga illa hjá eigandanum Mike Ashley hjá Newcastle að koma félaginu í sölu en hann hefur lengi leitað að kaupendum og þurft að lækka verðmiðann á b-deildarfélaginu um helming frá því sem hann vildi fá fyrst.

Samkvæmt heimildum Sky Sports fréttastofunnar hefur frjárfestingarfyrirtækið Profitable Group nú þurft að draga kauptilboð sitt í félagið til baka eftir að því mistókst að sýna fram á að það hefði nauðsynlegan 100 milljón punda bakhjarl til þess að geta gengið frá yfirtökunni.

Steve McMahon, fyrrum leikmaður Liverpool og enska landsliðsins, var að vinna fyrir fjárfestingarfélagið í yfirtökunni fyrirhuguðu og var búinn að láta í ljós að ef af yrði myndi Alan Shearer halda áfram sem knattspyrnustjóri Newcastle.

Shearer líkt og aðrir sem tengjast félaginu eru því enn í lausu lofti yfir framtíðinni en eins og staðan er núna fer Chris Hughton með knattspyrnustjórn félagsins.