Frakkar og Portúgalar áfram en Rússar sátu eftir

Undankeppni HM 2010 í Evrópu lauk í kvöld. Frakkland og Portúgal eru komin áfram til Suður-Afríku en Rússar urðu að játa sig sigraða í Slóveníu. Fyrr í kvöld komust Grikkir áfram eftir 1-0 sigur í Úkraínu.

Leikur Frakka og Íra í París í kvöld var dramatískur. Frakkar unnu fyrri leikinn í Írlandi, 1-0, en nú voru það Írar sem höfðu betur í venjulegum leiktíma, 1-0, með marki Robbie Keane í fyrri hálfleik.

Framlengja þurfti því leikinn en umdeilt atvik átti sér stað á 103. mínútu. Wiliam Gallas náði þá að skalla knöttinn í netið eftir sendingu Thierry Henry.

Henry tók þó boltann ólöglega með höndinni sinni en það sást greinilega í endursýningum í sjónvarpi. Írar mótmæltu mjög að markið var dæmt gott og gilt en niðurstaðan var engu að síður sú að Frakkar unnu samanlagðan sigur, 2-1.

Portúgal vann 1-0 sigur í Bosníu og þar með 2-0 samanlagðan sigur. Cristiano Ronaldo lék ekki með Portúgal í hvorugum leiknum vegna meiðsla en það var Raul Meireles, leikmaður Porto, sem skoraði sigurmark Portúgala í kvöld.

Slóvenía vann Rússland, 1-0, á heimavelli. Fyrri leiknum lauk með 2-1 sigri Rússa og komust Slóvenar því áfram á útivallarmarki Nejc Pecnik í Moskvu um síðustu helgi. Zlatko Dedic skoraði mark Slóvena í kvöld undir lok fyrri hálfleiks.