Næg orka fyrir fleiri verkefni

Nýtt álver Norðuráls í Helguvík mun nota um 44 prósent af þeirri orku sem fyrirhugað er að virkja á Suðurlandi á næstunni, samkvæmt upplýsingum frá Norður­áli. Forsvarsmenn fyrirtækisins mótmæla fullyrðingum að ekki sé til næg orka til að knýja álverið.

Samþykkt hefur verið umhverfis­mat fyrir virkjanir sem skila eiga 760 megavatta orku, en inni í þeirri tölu eru ekki virkjanamöguleikar í Gráuhnjúkum og Eldvörpum, sem talið er að muni skila í það minnsta 100 megavöttum. Til viðbótar eru á teikniborðinu virkjanir sem skila eiga 575 megavöttum til viðbótar. Þá eigi Landsvirkjun um áttatíu megavött af óseldri orku. Samtals eru því 1.415 megavött sem stendur til að virkja, eða hafa verið virkjuð. Af því mun álver Norðuráls nýta 625 megavött þegar það verður komið í fulla stærð.

Í pistli sem birtist á vef Norður­áls í gærkvöldi segir að margir hafi viðrað þá skoðun að erfitt verði að afla orku fyrir álver Norðuráls. „Þær skoðanir virðast flestar byggjast á mjög lítilli gagnaöflun eða þekkingu. Í sumum tilfellum er augljóslega leitast við að gera verkefnið tortryggilegt,“ segir á vef Norðuráls.

Jafnvel þó að einhverjir af þeim kostum sem nú eru til skoðunar reynist ekki hagkvæmir eða framkvæmanlegir verður yfirdrifin orka fyrir álverið og aðra starfsemi, segir á vef Norðuráls.- bj