Kosningar geta lengt kreppuna um tvö ár

Eins og öðrum var Þorgerði Katrínu Gunnarsdóttur, menntamálaráðherra og varaformanni Sjálfstæðisflokksins, brugðið eftir tíðindin sem Geir H. Haarde færði samflokksmönnum sínum í Valhöll í gær. „Ég er slegin yfir þessum tíðindum og get ekki hugsað um annað að svo stöddu,“ sagði Þorgerður við fréttamenn í Valhöll í gær.

Í samtali við Fréttablaðið sagði hún að í ljósi stöðunnar væri óumflýjanlegt að kjósa í vor. Hins vegar væri það ekki besti kosturinn með tilliti til efnahagsástandsins. Benti hún á að fræðimenn teldu að vegna kosninga hefði kreppan í Finnlandi á fyrrihluta tíunda áratugarins lengst um tvö ár. Svíar hefðu á hinn bóginn komist fyrr en ella út úr sínum efnahagsþrengingum þar sem ekki var gengið til kosninga.

Þorgerður segir að nú bíði formanna stjórnarflokkanna; Geirs og Ingibjargar Sólrúnar Gísladóttur utanríkisráðherra, að ræða framhaldið. „Þau fara yfir málin á morgun [í dag]. Þau hafa bæði sýnt mikla ábyrgð og gera sér grein fyrir erfiðri stöðu efnahagsmálanna og að taka þurfi erfiðar ákvarðanir sem þola ekki bið fram yfir kosningar.“ Þær ákvarðanir snúi að samskiptum og eftirfylgni vegna samkomulagsins við Alþjóðagjaldeyrissjóðinn og ríkisfjármálunum.

Þorgerður kveðst búast við að Samfylkingin fallist á kosningar 9. maí en formennirnir eigi eftir að ná um það sátt. Dagsetningin gæti þó hnikast eitthvað til.

Þorgerður var kjörin varaformaður Sjálfstæðisflokksins á landsfundi 2005, þegar Geir varð formaður. Hún segist ætla að velta því fyrir sér í rólegheitum hvort hún muni sækjast eftir formanns-embættinu á landsfundinum í lok mars. „Ég tel eðlilegt að varaformaður íhugi að leita eftir því að verða formaður en ætla að fara yfir það með mínu fólki.“

Spurð hvort ástandið í samfélaginu muni róast við að Sjálfstæðisflokkurinn lýsi yfir vilja til að kjósa í maí, kveðst Þorgerður telja það. „Að mörgu leyti er komið til móts við kröfur fólks um kosningar og ég held að þetta kæli samfélagið aðeins. En það er aldrei hægt að taka ákvarðanir sem róa alla,“ segir Þorgerður. bjorn@frettabladid.is