Bjargvættirnir frá Danmörku

„Ég veit ekki hvort fjáröflunin sem slík verður eitthvað sem öllu máli skiptir. Aðallega er þetta nú að sýna samstöðu, vekja athygli á málstaðnum og létta fólki lífið með rokktónleikum," segir Jacob Binzer aka Cobber, gítarleikari D-A-D, í samtali við Fréttablaðið.

Einhver stærsta rokksveit Norðurlanda, hin danska D-A-D, er á leið til landsins. Hún heldur tónleika á laugardagskvöld, 24. janúar, á Nasa til styrktar nauðstöddum Íslendingum sem búsettir eru í Danmörku. Tónleikarnir eru haldnir í samvinnu við samtökin Because We Care sem hafa að markmiði að styðja við bakið á bágstöddum Íslendingum í Danmörku, einkum ellilífeyrisþegum og námsmönnum sem hafa farið sérlega illa út úr bankahruninu og veikingu krónunnar. „Já, við eigum vin sem starfar með samtökunum. Við höfum séð í sjónvarpi hvernig saklaust fólk verður fyrir barðinu á þessu ástandi og gott að geta lagt sitt lóð á vogarskálarnar," segir Cobber.

Meðlimir D-A-D munu dvelja hér á landi í fimm daga og auk þess að spila á tónleikunum munu þeir taka upp vídeó hér. Hljómsveitin kom til Íslands fyrir margt löngu eða árið 1995 og tók þá einmitt upp myndband við eitt laga sinna. Cobber segir Ísland sérlega fagurt land sem bjóði upp á mjög sérstæða tökustaði. Aðspurður hvort eitthvað sé skipulagt annað meðan hljómsveitarmeðlimir dvelja hér á landi segir Cobber að þeir ætli að hitta innfædda - „We are going to meet the locals," segir þessi vingjarnlegi danski gítarleikari sposkur.

Hljómsveitin D-A-D á sér merkilegan og langan feril. Enn eru upprunalegir meðlimir hljómsveitarinnar að nema nýr trymblill kom til sögunnar árið 1999. „Jú, trommurum hættir til að springa í loft upp," segir Cobber. D-A-D var stofnuð árið 1984 og hóf þá að spila köntrí-skotið pönk. „Glimrokk? Jú, en við höfum daðrað við ýmsar tónlistarstefnur. Við höfum spilað hart rokk, metal, sumt má kalla klassískt rokk… við erum fyrst og fremst rokkhljómsveit en það má kannski segja að við séum of ruglaðir til að halda okkur á einhverjum einum tilteknum bási."

Meðlimir D-A-D eru meðal þeirra norrænu tónlistarmanna sem hafa náð hvað lengst á alþjóðavettvangi. Árið 1989 gerðu þeir milljóna dollara útgáfusamning við Warner Bros í tengslum við útgáfu plötunnar No Fuel Left for the Pilgrims sem sló rækilega í gegn. Þeir fóru í tónleikaferð um Bandaríkin og stóðu á barmi heimsfrægðar sem lét á sér standa. Cobber lætur sér þetta í léttu rúmi liggja, segir þetta hafa verið stórt fyrir þá þó að útgáfufyrirtækið hafi orðið fyrir vonbrigðum.

„Væntingarnar voru svo miklar á þessum tíma. Og menn vilja alltaf meira." Nú er hins vegar það á dagskrá hjá hljómsveitinni að fylgja eftir sinni tíundu plötu sem nýverið kom út. Monster Philosophy. En þar kennir ýmissa grasa og stílbrigða sem lýsa vel þessari fjölhæfu dönsku hljómsveit. Aðspurður hvort Cobber þekki íslenska tónlist og tónlistarmenn þá nefnir hann þessa hefðbundnu grunuðu: „Jú, Björk. Auðvitað. Sykurmolana og Sigur Rós."

En… þú hlýtur að þekkja Bubba Morthens?

„Ehhh, nei, því miður. Ég veit ekki hvaða hljómsveit það er."

jakob@frettabladid.is