Tími til að drepa eða verða drepinn

Cristiano Ronaldo segir að Man. Utd sé með betra og reynslumeira lið en Inter en liðin mætast í sextán liða úrslitum Meistaradeildarinnar annað kvöld.

Knattspyrnuunnendur geta vart beðið eftir leiknum enda er Sir Alex Ferguson að mæta Jose Mourinho en þeir háðu marga hildina er Mourinho stýrði Chelsea.

„Núna skipta allir leikir gríðarlega miklu máli. Það er tími til að drepa eða verða drepinn," sagði Ronaldo í spjalli við uefa.com.

„Það lið sem tapar er úr leik og við viljum ekki tapa. Þetta verður erfiður leikur en ég held að Man. Utd sé betra og reynslumeira lið. Inter er samt lið sem þarf að bera virðingu fyrir. Þetta er gott lið sem er á toppi ítölsku deildarinnar þannig að við verðum að gæta að okkur.

„Inter er með reynslumikla menn í sínum röðum en við eigum líka okkar ása og frábæra leikmenn. Við erum reynslumeira lið og ríkjandi meistarar. Þetta verður góður leikur og betra liðið mun sigra," sagði Ronaldo.