Eyðist það sem af er tekið

Herdís Þorvaldsdóttir skrifar um umhverfismál

Íslenska plöntuflóran,er fátæk og smávaxin á móts við nágrannalöndin.

Auk þess hefur hún þurft að búa við stjórnlausa beit nagdýra um aldir,svo að nú er svo komið að margar eru í útrýmingarhættu og margar þyrftu gjörgæslu við, oft þær viðkvæmustu og fallegustu,segir í riti Náttúrufræði stofnunar. Hvað er svo gert þeim til bjargar?

Frá Alþingi koma af og til ályktanir um friðun vissra plöntutegunda,tóm sýndarmennska.

Hvernig er hægt að friða plöntur þar sem lausaganga búfjár, viðgengst á landinu. Hver ætlar að tilkynna u.þ.b.1000,000 skepnum sem fara á beit upp um fjöll og firnindi hvaða blóm þær megi ekki bíta? Nú er komin önnur vá sem steðjar að plöntunum. Áður fyrr tíndi fólk smávegis af plöntum fyrir sig og sína sem er sjálfsagt. Á undanförnum árum hafa sprottið upp fyrirtæki um allt land sem vinna vörur úr íslenskum jurtum og selja til útlanda og þurfa því ógrynni af plöntum í sína vinnslu. Þessar plöntur eru tíndar úti í villtri náttúrunni á sumrin, svo þær ná aldrei að sá sér að haustinu. Hvað skyldu margar vera eftir á tínslusvæðunum eftir margra ára tínslu margra fyrirtækja? Ég sá í amerísku tímariti að fyrirtæki sem vinna úr plöntum þyrftu að rækta sýnar plöntur sjálfir. Við viljum gjarnan hafa blómplöntur í vistlandinu okkar. Hér er ekki nokkurt eftirlit með þessari starfsemi, hver sem vill getur stofnað sitt fyrirtæki og tínt plöntur úr villtri náttúrunni eftir þörfum. Eitt fyrirtækið sagði i viðtali að það þyrfti nokkur tonn af jurtum það haustið og sendi fólk til að tína og borgaði þeim vel fyrir kílóið.

Væri ekki lágmark að fyrirtækin þyrftu að tilkynna hvað mikið þau tíndu og hvar,svo hægt væri fylgjast með ástandinu á svæðunum. Eyðist sem af er tekið ef ekkert kemur í staðinn.

Vinsamlegast, náttúruvernd og tínslufólk hafi samráð og skoði hvað er að gerast í plöntuflórunni.

Höfundur er leikkona og fyrrverandi formaður Lífs og lands.