Wenger: Við ætlum að vinna

Arsene Wenger og hans menn í Arsenal ætla ekki að leika upp á jafntefli þegar þeir taka á móti Villarreal í síðari leik liðanna í Meistaradeildinni annað kvöld.

Arsenal er í góðri stöðu til að komast í undanúrslitin eftir að hafa skorað dýrmætt útivallarmark í 1-1 jafntefli liðanna á Spáni í fyrri leiknum. Hann segir leikinn annað kvöld verða enn eitt tækifærið fyrir ungt lið sitt að sýna andlegan styrk sinn.

"Liðið hefur sýnt mikinn andlegan styrk á þessari leiktíð og þessi leikur er gott tækifæri til að halda áfram að sýna hann. Staðfestan, hungrið og gæðin eru til staðar í liðinu og nú fáum við hvert prófið á fætur öðru. Það huggar mig að við höfum náð að standa af okkur mótlæti að undanförnu og við ætlum að vinna þennan leik. Við erum ekki vanir að fara í leiki með það fyrir augum að gera markalaust jafntefli," sagði Wenger.