Gylfi Þór: Bara smá misskilningur

Gylfi Þór Sigurðsson lék sinn fyrsta leik með U-21 landsliði Íslands í rúmt ár er Ísland vann í dag 2-1 sigur á Norður-Írlandi í Grindavík.

Gylfi bað um frí frá leik í vor en Eyjólfur Sverrisson leit á það sem svo að hann væri þar með hættur að gefa kost á sér í landsliðið.

„Þetta var svolítið skrýtið. Þetta var bara misskilningur á milli mín og Eyjólfs," sagði Gylfi Þór. „En við töluðum saman á föstudagskvöldið eftir leikinn gegn San Marino og leystum málið. Það var ekkert mál," sagði Gylfi eftir leikinn í dag.

„Annars var ekkert mál að koma aftur inn í liðið. Ég hef oft áður spilað með þessum strákum og það var því ekkert nýtt fyrir mig. Þetta var kannski ekki minn besti leikur en það var fyrir öllu að ná þremur stigum."

„Ég er bara fyrst og fremst ánægður með að vera kominn aftur inn í liðið."