Bilic vill halda áfram sem landsliðsþjálfari Króatíu

Króatar sátu eftir með sárt ennið í 6. riðli undankeppni HM 2010 þar sem þeir enduðu í þriðja sæti á eftir Úkraínumönnum og Englendingum og misstu þar með af tækifærinu á að komast á lokakeppnina næsta sumar.

Landsliðsþjálfarinn Slaven Bilic hjá Króatíu er þó ekki af baki dottinn og hefur líst yfir áhuga sínum á að halda starfi sínu áfram og knattspyrnusamband Króatíu er sagt í skýjunum með það og því aðeins um formsatriði að ræða að gengið verði frá samningum á milli aðila.

„Ég hef trú á leikmannahópi landsliðsins því ég veit að hann býr yfir þeirri hvöt og því stolti sem þarf til að ná árangri. Ég er því tilbúinn að halda áfram og lít raunar á það sem skyldu mína við þjóð mína að gera það. Mistök okkar að komast á lokakeppnina litaðist af meiðslum lykilmanna og það er ólíklegt að slíkt ólán hendi okkur aftur," er haft eftir Bilic.

Bilic lék á sínum tíma með West Ham og Everton í ensku úrvalsdeildinni og hefur síðan hann snéri sér að þjálfun verið reglulega orðaður við félög í ensku úrvalsdeildinni.

Bilic hefur sjálfur líst yfir áhuga sínum á að starfa á Englandi en allt útlit er fyrir því að nokkur bið verði á því að hann taki sér starf þar.