Ekkert lát á innbrotum

Ekkert lát virðist vera á þeirri innbrotaöldu sem ríður yfir höfuðborgarsvæðið þessa dagana. Frá því klukkan sjö í morgun hefur lögreglunni borist tilkynningar um tvö innbrot og tvær innbrotstilraunir.

Fréttastofa sagði frá því í gær að hátt í 50 innbrot og þjófnaðir hafi verið kærð til lögreglunnar á höfuðborgarsvæðinu um helgina, sem er talsvert meira en undanfarnar verslunarmannahelgar.

Þá handtók lögreglan mann á sjöunda tímanum í morgun, sem var að reyna að brjótast inn í íbúðarhús í austurborginni. Í poka sem hann hafði meðferðis voru ýmis áhöld til innbrota eins og til dæmis kúbein, og auk þess gríma til að hylja andlitið og gúmíhanskar til að fingraför fyndust ekki.