Peter Stormare til liðs við Anitu Briem

Sænski stórleikarinn Peter Stormare hefur bæst í fríðan leikhóp bandarísku myndasögumyndarinnar Dead of the Night. Eins og Fréttablaðið hefur greint frá er íslenska leikkonan Anita Briem þar í einu aðalhlutverkanna ásamt Ofurmenninu Brandon Routh og sjónvarpsstjörnunni Taye Diggs.

Þá greina ítalskir fjölmiðlar frá því að glímukappinn Kurt Angle muni einnig leika lítið hlutverk í myndinni.

Stormare er einn þekktasti leikari Svía og hefur afrekað ansi margt á löngum ferli; hann skaust upp á stjörnuhimininn sem hinn lánlausi mannræningi Gaear Grimsrud í Coen-myndinni Fargo og hefur síðan þá leikið stór hlutverk í kvikmyndum á borð við Bad Boys II, Armageddon og þá ættu sjónvarpsáhorfendur að kannast við hann úr bæði CSI og Prison Break.

Glímukappinn Kurt Angle vann til gullverðlauna í sinni grein á Ólympíuleikunum í Atlanta árið 1996 en hefur síðan þá, líkt og svo margir þéttvaxnir kappar, reynt fyrir sér í kvikmyndaleik með fremur misjöfnum hætti.

Tökur á Dead of Night standa nú yfir í New Orleans en myndin er byggð á ítölskum myndasögum sem segja frá einkaspæjaranum Dylan Dog, baráttu hans við ókunn öfl og glímuna við sjálfa ástina. - fgg