Bandaríkin með Brasilíu í undanúrslitin

Bandaríkjamenn tryggðu sér í kvöld sæti í undanúrslitum Álfukeppninnar. Liðinu dugði 3-0 sigur gegn Egyptum þar sem að Ítalíu tapaði með sama mun fyrir Brasilíu.

Brasilía hlaut því fullt hús stiga í B-riðli en hin liðin þrjú hlutu öll þrjú stig. Egyptaland var með lakasta markahlutfallið, þrjú mörk í mínus en bæði Bandaríkin og Ítalía voru með tvö mörk í mínus. Bandaríkjamenn skoruðu hins vegar fjögur mörk í sínum leikjum en Ítalir þrjú og dugði það til að fleyta þeim í undanúrslitin.

Það voru þeir Charlie Davies, Michael Bradley og Clint Dempsey sem skoruðu mörk Bandaríkjanna í kvöld í sigrinum á Egyptum. Luis Fabiano skoraði tvö mörk Brasiíu í kvöld gegn Ítölum and Andrea Dossena varð fyrir því óláni að skora sjálfsmark í leiknum.

Í fyrri undanúrslitaviðureigninni mætast því Spánverjar og Bandaríkin og fer leikurinn fram á miðvikudaginn. Brasilía og heimamenn í Suður-Afríku mætast svo á fimmtudaginn.

Úrslitaleikurinn og leikurinn um þriðja sætið fara svo fram á sunnudaginn næstkomandi.