Býflugur töfðu leik Mexíkó og El Salvador um tíu mínútur - Myndband

Mexíkó tryggði sér um helgina sæti á HM í Suður-Afríku með 4-1 stórsigri á El Salvador. Leikurinn var þó stöðvaður í tíu mínútur á meðan vallarstarfsmenn reyndu að forða leikmönnum frá býfluguþyrpingu sem hafði komið sér fyrir á vellinum.

Eins og sjá má hér þá gekk mikið á í upphafi leiksins. Aðeins tæpum tveimur mínútum eftir að leikurinn var flautaður á fór markvörður El Salvador fram á það við dómara leiksins að stöðva leikinn. Hópur býflugna hafði komið sér fyrir í markinu.

Ákveðið var að beita slökkvitækjum á býflugurnar í markinu. Það reyndist skammgóður vermir þar sem býflugurnar færðu sig bara um set og settust nú á hljóðnema sem var staðsettur rétt hjá.

Eftir um tíu mínútna töf var þó loksins hægt að halda leiknum áfram.