Enn ein meiðslin hjá Theo Walcott - nú er það hnéð

Theo Walcott leikmaður Arsenal er langt kominn með að vera óheppnasti leikmaður ensku úrvalsdeildarinnar því þessi 20 ára strákur stekkur úr einum meiðslum í önnur.

Theo Walcott var nýkominn til baka úr meiðslum á öxl þegar hann meiddist á hné á æfingu að því virðist þegar hann var að labba til baka inn í klefa. Hann missir örugglega af næsta leik Arsenal og getur heldur ekki spilað með enska 21 árs landsliðinu í næstu viku.

„Hann fer í myndatöku í dag og við erum bæði hissa og áhyggjufullir vegna þessara meiðsla. Hann var kominn sterkur til baka eftir hin meiðslin," sagði Arsene Wenger, stjóri Arsenal.

„Theo læsti hnénu þegar hann var að labba til baka frá æfingu og þetta gæti verið brjóskskemmd. Þetta var eðlileg æfing og það gæti verið að hann hafi meiðst á æfingunni en það hafi ekki komið í ljós fyrr en hann stoppaði," sagði Wenger.