Kastaði sér út í fljót til að losna við nöldur

Kínverskur vörubílstjóri lét sig gossa út í straumharða á til að losna við nöldrið í konunni sinni.

Maðurinn var ásamt konunni á báti úti á miðju Yangtze fljóti þegar honum var nóg boðið.

Áhöfn skipsins sá manninn hlaupa út úr káetu sinni með lófana um eyrun, að því er segir á fréttavef Ananova.

Hann hrópaði: „Ég get þetta ekki lengur," í sífellu, svo áhöfnin taldi fyrst að hann væri með höfuðmeiðsli - þar til konan kom út á eftir honum.

Það síðasta sem maðurinn sagði að sögn áhafnarinnar áður en hann stökk útbyrðis var: „Nú þarf ég hlé."

Áhöfnin taldi manninn af þegar hann fannst ekki með leitarljósum, en lögregla fann hann síðar um kvöldið þar sem hann hafði synt yfir á bakka árinnar.

„Ég hélt ég myndi láta lífið, en jafnvel það er skárra en nöldrið í konunni minni," á maðurinn að hafa sagt lögreglu.

Parið hittist svo daginn eftir á lögreglustöðinni þar sem konan lofaði að hætta að nöldra stöðugt í manninum.