Jökla kemur veiðimönnum á óvart enn á ný

Það kom leigutökum við Jöklu skemmtilega á óvart þegar lax veiddist langt upp í Jökuldal úr hliðará Jöklu. Hingað til hefur ríkt óvissa um hvort Jökla væri laxgeng upp dalinn vegna þess að um marga erfiða fossa og flúðir er að fara fyrir fiskinn á leið sinni upp ána.

Hingað til hefur lax safnast saman við svokallaðan Steinboga, rétt neðan við þjóðvegsbrúna á Jöklu. Hins vegar veiddist lax úr hliðaránni Hnefilsdalsá, sem rennur langt þar fyrir ofan, í vikunni.

Það var félagi úr Mokveiðifélaginu svokallaða sem dró laxinn en þeir félagar höfðu veitt vel á neðri svæðum Jöklu dagana á undan.

Á heimasíðu leigutakans, Veiðiþjónustunnar Strengja, segir að þetta séu frábær tíðindi, enda staðfest að göngufiskur kemst upp á gífurlega stórt svæði upp allan Jökuldal. Einnig að hugsanlega sé svo ofarlega í ánni náttúrulegt klak því engum seiðum var sleppt í Hnefilsdalsá í fyrra og laxinn því væntanlega af náttúrulegum uppruna árinnar.