Serbar búnir að tryggja sig á HM - Frakkar öruggir með annað sætið

Serbar gulltryggðu farseðilinn á lokakeppni HM 2010 næsta sumar með stæl þegar þeir unnu 5-0 stórsigur gegn Rúmenum í 7. riðli undankeppninnar í kvöld.

Milan Jovanovic skoraði tvennu og Zdravko Kuzmanovic, Marko Pantelic og Nikola Zigic eitt mark hver en Cristian Chivu fékk rauða spjaldið hjá Rúmeníu í stöðunni 3-0 þegar skammt var eftir af leiknum.

Frakkar eru öruggir með annað sætið í riðlinum eftir 5-0 sigur gegn Færeyingum en staðan var 2-0 í hálfleik.

André-Pierre Gignac skoraði tvennu fyrir Frakka en William Gallas, Nicolas Anelka og Karim Benzema sitt markið hver.