Jóhanna: Ásakanir framsóknarmanna fráleitar

Framsóknarmenn saka forsætisráðherra um að reyna koma í veg fyrir að Íslendingar fái lán frá Norðmönnum framhjá Alþjóðagjaldeyrissjóðnum. Fráleitar ásakanir segir forsætisráðherra.

Framsóknarmenn funduðu í með norskum þingmönnum í vikunni til að kanna meðal annars áhuga Norðmanna á að veita Íslendingum lán framhjá Alþjóðagjaldeyrissjóðnum. Er talað um allt að 100 milljarða norskra króna eða sem nemur um 2200 milljörðum íslenskra króna.

Oddvitar norska Miðflokksins, sem er einn af þremur stjórnarflokkum þar í landi og systurflokkur Framsóknarflokksins, hafa tekið vel í hugmyndir um slíkt lán. Verkamannaflokkurinn, flokkur Jens Stoltenberg, forsætisráðherra, er hins vegar ekki eins áhugasamur.

Jóhanna Sigurðardóttir sendi Stoltenberg bréf á mánudaginn og spurði hvort Íslendingum stæði slíkt lán til boða. Stoltenberg svaraði Jóhönnu á fimmtudag og sagði að svo væri ekki. Málið hefur þó ekki verið rætt innan norsku ríkisstjórnarinnar.

Jóhanna segir að svar Stoltenbergs hafi verið afdráttarlaust. „Það kom fram að Norðmenn eru okkur velviljaðir en þeirra opinbera stefna er að lán til Íslendinga sé hluti af norræna lánapakkanum innan efnahagsáætlunar Alþjóðagjaldeyrissjóðsins og þeir vilja ekki fara út fyrir það," segir Jóhanna.

Sigmundur Davíð Gunnlaugsson, formaður Framsóknarflokksins segir að allt líti út fyrir að svar Stoltenbergs hafi varið pantað. „Mér sýnist allt benda til þess enda var búið að upplýsa okkur um það að það hefði ekki annað borist frá Samfylkingunni en ítrekun um að það ætti að fylgja þeirri stefnu sem liggur fyrir. Aftur og aftur var það ítrekað við okkur að Verkamannaflokkurinn norski fylgdi eða tæki að minnsta kosti tillit til þess sem kæmi frá Samfylkingunni," segir Sigmundur.

Samfylkingin vilji því ekki hverfa frá samstarfinu við Alþjóðagjaldeyrissjóðinn og sé tilbúinn að koma í veg fyrir að samstarfinu verði spillt með lánveitingum framhjá sjóðnum.

Um þetta segir Jóhanna: „Þetta er fráleit fullyrðing og ég skil ekki hvernig þeim dettur það í hug að ég geti pantað niðurstöðu frá norska forsætisráðherranum. Alveg fráleitt. Auðvitað er það líka fráleitt að ég sé að beita mér gegn lánveitinum án skilyrða til okkar Íslendinga."