Ronaldo: Ummæli Rooney voru pottþétt sögð í gríni

Portúgalinn Cristiano Ronaldo stendur nú í ströngu með landsliði sínu í 1. undanriðli HM 2010 en liðið er í þriðja sæti og dugir ekkert nema sigur í síðustu tveimur leikjum sínum gegn Ungverjalandi og Möltu til þess að eygja von um að komast á lokakeppnina.

Enski landsliðsmaðurinn Wayne Rooney, fyrrum liðsfélagi Ronaldo hjá Manchester Untied, lét hafa eftir sér í nýlegu viðtali að það væri fínt ef Portúgal kæmist ekki á lokakeppnina en Ronaldo telur að hann hafi einungis verið að grínast.

„Rooney er góður vinur minn og ég er viss um að hann hafi bara verið að grínast. Hann veit að við erum með gott lið og við höfum spilað nokkrum sinnum á móti Englandi og alltaf unnið og ég veit að Rooney myndi vilja mæta okkur aftur frekar en að forðast okkur," sagði Ronaldo á blaðamannafundi fyrir leikinn gegn Ungverjum.