Ekki verður sagt frá gestum Jóhönnu

Forsætisráðuneyti Jóhönnu Sigurðardóttur neitar að gefa upp hvaða fólk hefur fengið viðtal við hana, síðan núverandi stjórn hóf störf 1. febrúar.

Þetta er rökstutt í svarbréfi til blaðsins með því að stjórnvöldum beri ekki skylda til að veita slíkar upplýsingar, enda varða þær ekki eitt sérstaklega tiltekið mál.

Samkvæmt upplýsingalögum eiga stjórnvöld ekki að þurfa að útbúa ný gögn til að upplýsa almenning, og er einnig vísað til þess í bréfinu. Miðað við það er hvergi til listi yfir þá sem hafa fengið viðtal við ráðherrann.

Að lokum bendir ráðuneytið á að þeir, sem heimsótt hafa Jóhönnu, hafi ekki gert ráð fyrir því að upplýsingar um það yrðu gerðar opinberar.

Greint hefur verið frá því í blaðinu að Barack Obama, forseti Bandaríkjanna, ætlar að birta gestabók sína á heimasíðu Hvíta hússins.

Sú birting verður þó ekki afturvirk heldur einungis með nöfnum gesta sem komu eftir að þessi ákvörðun var tekin. Forsetinn segir það rétt kjósenda að vita við hverja hann ræði áður en hann tekur stefnumótandi ákvarðanir.

Niðurlag bréfs forsætisráðuneytis fjallar um að nú sé unnið að endurskoðun upplýsingalaga, meðal annars um að hvaða marki megi rýmka upplýsingarétt almennings.

Þá er beðist velvirðingar á því hve lengi tók að svara fyrirspurninni, sem var send 24. september. Svarið var póstlagt 20. október, eftir ítrekanir blaðsins. Samkvæmt lögum á að svara fyrirspurnum innan sjö daga. - kóþ