Ekki dagur stórra yfirlýsinga

„Ég hef ekki verið á formannsbuxum. Ég hef hins vegar verið í framboði til varaformanns og fengið góð viðbrögð um land allt við því. Síðan hef ég verið að stefna á borgarstjórnarkosningarnar," segir Dagur B. Eggertsson, borgarfulltrúi Samfylkingarinnar. Dagur segir ekki tímabært að vera með stórar yfirlýsingar í dag. Tíðindi dagsins séu þau að Ingibjörg Sólrún Gísladóttir sé að stíga til hliðar og skarð hennar verði vandfyllt. Hann segir að í sínum huga sé að mörgu leyti rökrétt að forsætisráðherraefnið og núverandi forsætisráðherra taki einnig við formennsku í Samfylkingunni.

„Þetta er ný staða og ég held að samfylkingarfólk og forystan eigi að sameinast um að finna lausn sem sameinar flokkinn og síðan þjóðina á bak við okkar leið út úr kreppunni. Það er auðvitað verk flokksins fyrir kosningarnar í vor," segir Dagur. Hann segir því að samfylkingarmenn eigi að gefa sér tíma til að meta stöðuna. „Ég held að það sé ekki óeðlilegt á sama tíma og við við sendum Ingibjörgu Sólrúnu hlýja og góða strauma," segir Dagur.