Sunnlendingar lemja konur

Tvær líkamsárásir voru tilkynntar til lögreglunnar á Selfossi síðustu helgi en í báðum tilvikum var um karlmenn að ræða sem réðust að konum. Annað tilvikið átti sér stað á skemmtistaðnum Hvíta húsinu á Selfossi. Maðurinn sló konu hnefahöggi í andlitið með þeim afleiðingum að tönn brotnaði.

Seinna tilvikið átti sér stað aðfaranótt sunnudags þar sem kona varð fyrir árás karlmanns í anddyri Hótels Arkar í Hveragerði. Samkvæmt tilkynningu frá lögreglunni þá hlaut konan nokkra áverka á andliti, bólgur og mar.

Lögreglan rannsakar bæði málin.