Cattermole vekur áhuga - Arsenal og Liverpool orðuð við leikmanninn

Samkvæmt Sky Sports fréttastofunni er enski U-21 árs landsliðsmaðurinn Lee Cattermole hjá Wigan undir smásjá stórliðanna Arsenal og Liverpool en Sunderland hefur ítrekað reynt að kaupa hann í sumar.

Stjórnarformaðurinn Dave Whelan hjá Wigan er þó ekki á því að missa leikmanninn frá félaginu.

„Ég er búinn að segja forráðamönnum Sunderland að þeir séu að eyða tíma sínum. Cattermole verður áfram hjá Wigan á næstu leiktíð. Hann er ánægður hér og við viljum ekki missa hann þannig að ég sé ekki hvað muni breyta því að hann verði áfram," segir Whelan.

Manchester United náði að kaupa Antonio Valencia frá Wigan á háa fjárhæð fyrr í sumar og það er spurning hvort að Whelan og Wigan standist áhlaup Arsenal eða Liverpool í Cattermole. Síðasta kauptilboði Sunderland í leikmanninn sem var hafnað er talið hafa verið á bilinu 7-8 milljónir punda.