Katrín Ómarsdóttir í fyrsta sinn í byrjunarliðinu á árinu

Sigurður Ragnar Eyjólfsson kom nokkuð á óvart þegar hann tilkynnti byrjunarliðið sitt fyrir fyrsta leikinn á EM sem er á móti Frökkum í kvöld. Sigurður Ragnar valdi Katrínu Ómarsdóttur í byrjunarliðið frekar en Dóru Stefánsdóttur en Katrín hefur ekki verið í byrjunarliðinu áður á þessu ári.

Katrín Ómarsdóttir var síðast í byrjunarliðinu í 5-0 sigri á Slóveníu á Laugardalsvellinum 21. júní 2008 en síðan hefur liðið spilað tólf landsleiki. Dóra Stefánsdóttir gat ekki spilað þann leik vegna meiðsla en kom inn í byrjunarliðið aftur í næsta leik á eftir.

Katrín Ómarsdóttir hefur bara verið í byrjunarliði í 4 af 24 landsleikjum sínum en þar á meðal er fyrsti landsleikurinn undir stjórn Sigurðar Ragnars þegar liðið tapaði 1-2 fyrir Ítalíu á Algarve-mótinu 7. mars 2007.

Dóra Stefánsdóttir hafði verið í byrjunarliðinu í undanförnum fjórtán landsleikjum sínum og þetta verður aðeins í annað skipti sem hún byrjar á bekknum eftir að Sigurður Ragnar tók við liðinu 2007. Hinn leikurinn var leikur á móti Portúgal á Algarve-mótinu 2008.