Rooney ætlar að bæta markamet Charlton

Wayne Rooney hefur sett það á markmiðaskrána sína að bæta markamet Bobby Charlton hjá enska landsliðinu. Rooney skoraði tvö mörk gegn Andorra í gær og hefur því skorað 24 mörk fyrir enska landsliðið.

Hann er þar með kominn upp að hlið Geoff Hurst en Rooney langar í met Charlton sem skoraði 49 mörk á sínum landsliðsferli.

„Það væri frábært afrek að bæta met Charltons. Ég veit af þessu meti og ætla mér að ná því," sagði Rooney sem er aðeins 23 ára gamall.

Hann er búinn að skora 10 mörk í síðustu 7 landsleikjum. Þessi tíu mörk á einni leiktíð er það mesta hjá enska landsliðinu síðan Gary Lineker skoraði 10 leiktíðina 1990-91.

Það hafði gengið illa hjá Rooney að skora áður en Fabio Capello tók við landsliðinu en mörkin hafa komið undir stjórn Ítalans.