Ósammála um hvort eigandastefnan sé úrelt

Guðlaugur Þór Þórðarson, þingmaður Sjálfstæðisflokksins, sagði á þingfundi í dag að bæði Bankasýsla ríkisins og eigandastefna þess væru orðin algjörlega úrelt með samkomulagi ríkisins við skilanefndir bankanna. Með samkomulaginu er gert ráð fyrir að skilanefndir fari með eignarhlut ríkisins í bönkunum.

Álfheiður Ingadóttir, formaður viðskiptanefndar, telur að samningarnir breyti engu um gildi eigandastefnunnar.

„Þetta er bara eigandastefna ríkisins, hvort heldur sem ríkið er 100 prósent eigandi, eða 10 prósenta eigandi í Íslandsbanka og Kaupþingi, hundrað prósenta eigandi í Landsbankanum og hlutaeigandi í sparisjóðum," segir Álfheiður í samtali við fréttastofu.

Hún segir að þó einfaldara sé að framfylgja stefnunni að fullu þegar ríkið eigi bankana með öllu muni fulltrúar ríkisins í bankaráðum áfram starfa í anda eigandastefnunnar.

Um Bankasýsluna segir Álfheiður:

„Bankasýslunni er ætlað að fara með eignarhlut ríkisins í fjármálafyrirtækjum á grunni eigendastefnunnar hvort sem hann er hundrað prósent eða fimm prósent," og bendir jafnframt á að ef kröfuhafar eignist meirihluta Íslandsbanka og Kaupþings verði hún þó umfangsminni en ella.

Hún segir ekki annað standa til en afgreiða frumvarp um Bankasýsluna eins og til stóð.

Álfheiður segist að lokum mjög ánægð með eigandastefnuna og segir henni hafa verið tekið vel í viðskiptanefnd í gær.