Tveir leikir í ensku úrvalsdeildinni í dag

Tveir leikir fara fram í ensku úrvalsdeildinni í dag. Aston Villa tekur á móti Everton klukkan 13.00 og Fulham heimsækir Manchester City klukkan 15.10.

Villa er í fimmta sæti og Everton í því sjötta, aðeins stigi á eftir. Villa nær að saxa forskot Arsenal í fjórða sætinu, sem gefur síðasta sætið í Meistaradeildina að ári, niður í sex stig með sigri.

Gabrial Agbonlahor er tæpur hjá Villa og þeir Emile Heskey, fyrirliðinn Martin Laursen og Wilfred Bouma eru allir meiddir ásamt miðverðinum Carlos Cuellar. Zat Knight er því líklegur til að spila við hlið Curtis Davies í hjarta varnarinnar.

Tim Howard verður í marki Everton eftir að hafa unnið bug á meiðslum sínum frá síðustu helgi. Hann kenndi sér eymsla í kálfa en mun harka af sér. David Moyes hefur annars úr öllu sínu liði að velja hjá Everton.

Fulham situr í tíunda sætinu og City er sæti á eftir. Bæði félögin eru í miðjuþófinu og sigla lygnan sjó.

Craig Bellamy gæti misst af leiknum vegna hnémeiðsla hjá City og þá eru Benjani, Shaun Wright-Phillips og Vincent Kompany allir tæpir.

Fulham vonast til að bæði Zoltan Gera og Toni Kallio nái að spila eftir meiðsli.