Innlent

Kallar eftir tillögum frá Þingvallanefnd

Óli Tynes skrifar
Lögreglan á Selfossi biður þá sem fara til Þingvalla næstu daga að halda sig í hæfilegri fjarlægð frá brunarústum Valhallar. Rannsókn er hafin á upptökum brunans, skýrslur hafa verið teknar af nokkrum starfmönnum hótelsins og vettvangsrannsókn verður framhaldið á mánudag. Jóhanna Sigurðardóttir forsætisráðherra skoðaði brunarústirnar í dag. Hún sagðist mundu leggja fyrir Þingvallanefnd að koma með tillögur um hvað gera skuli á staðnum.

Það er ekki falleg sjón sem blasir þar sem áður stóð Hótel Valhöll. allt brunið og slökkviliðsmenn að taka til. Líklegra verður byrjað á því að rífa restina af hótelinu.

Það sýndist reyndar sitt hverjum um Hótel Valhöll. Fyrir nokkrum árum var í umræðunni lagt til að þetta gamla saggabæli yrði hreinlega rifið, eins og það var orðað. Þeir sem svo voru þenkjandi þurfa ekki að hafa áhyggjur af því lengur.

Það var ekki við neitt ráðið eftir að eldurinn kviknaði um fjögur leytið í gær. Fyrstu vísbendingar voru brunabjöllur sem fóru af stað þegar verið var að grilla í eldhúsinu. Eldur hafði komist í gufugleypi og læst sig í þakklæðningu. Gufugleypar eru oft fitugir að innan.

Starfsmenn reyndu í fyrstu að finna hvar eldurinn logaði og fóru meðal annars upp á þak þar sem þeir gengu fram og aftur. Í leit að reyk og hita. Óljóst er hvort þeir hringdu slökkvilið fyrir þá könnun eða eftir að eldurinn gerði óþyrmilega vart við sig.

Allavega sýndi starfsfólkið snör viðbrögð þegar það bjargaði fjórum stórum gaskútum út úr húsinu. En þegar slökkvilið kom á vettvang var húsið alelda og engu hægt að bjarga.

Jóhanna Sigurðardóttir, forsætisráðherra kannaði vegsummerkin í dag. „Þetta er alveg hrikalega sjón og sorglegt að sjá hvernig húsið er farið. Valhöll er mikill hluti af þessum sögufrægastað."

„Ég held að það sé nauðsynlegt að Þingvallanefnd skoði þetta. Ný nefnd verður skipuð eftir helgi og ég mun óska eftir að eiga fund með henni," segir forsætisráðherra.

Valhöll var upphaflega byggð á Þingvöllum árið 1892 og flutt á núverandi stað árið 1929. Þar hefur því verið veitinga- og gistihús í eitthundrað og tíu ár.

Húsið var í eigu ríkisins en það var einkafyrirtæki sem leigði reksturinn. Brunabótamat hússin er 280 milljónir króna en margvísleg önnur verðmæti töpuðust einnig.

Úlfar Ingi Þórðarson hótelstjóri tók við rekstrinum í maí. Hann hafði lagt í mikinn kostnað og mikla vinnu við lagfæringar sem nú eru svartar rústir eins og annað.


Tengdar fréttir

Horfði á ættarsetrið brenna í sjónvarpinu

Hótel Valhöll var í eigu fjölskyldu Jóns Ragnarssonar veitingamans í um fjörutíu ár. Foreldrar hans þau Ragnar Jónsson og Júlíana Sigurbjörg Erlendsdóttir eignuðust hótelið árið 1963 og var það í eigu fjölskyldunnar allt til ársins 2002 þegar íslenska ríkið keypti húsið. Það var því að vonum erfitt fyrir Jón að fylgjast með fréttum í kvöld þar sem hann horfði á Hótel Valhöll í ljósum logum.

Valhöll rústir einar eftir stórbrunann

Ekki stendur nú steinn yfir steini af Hótel Valhöll á Þingvöllum sem brann í gær. Starfsfólk gerði sitt besta til að slökkva eldinn en brunavörnum var mjög ábótavant.

Eyðileggingin algjör

Hótel Valhöll á Þingvöllum fór illa í eldsvoða í gær og er talið ónýtt. Ekki var brugðist við skýrslu frá árinu 2006 sem sagði brunavörnum ábótavant. Ég er ekki hissa á þessum endalokum segir annar höfunda svartrar skýrslu.

Símstöð brann í Valhöll

Lítil símstöð í eigu Símans var inni í Valhöll sem stendur nú á björtu báli. Þetta þýðir að um þrjátíu viðskiptavinir á svæðinu munu missa talsamband. Tekið gæti nokkra daga að koma upp nýrri símstöð en að sögn upplýsingafulltrúa Símans verða hafðar hraðar hendur við að koma viðskiptavinum aftur í samband.

Valhöll brunnin til kaldra kola

Hótel Valhöll er brunnin til grunna og nú standa einungis steinveggir þar sem hinn reisulegi burstabær áður stóð. Engu var hægt að bjarga að sögn slökkviliðsmanna á staðnum og hægt verður að moka rústunum í burtu.

Helgi Björns næstum fimmtugur í Valhöll

„Hvað verð ég gamall? Ehhh, 49 ára. Ég er reyndar búinn að vera það í nokkur ár. Ég ætla að vera það áfram. Þetta er ágætur aldur," segir Helgi Björnsson sem á afmæli í dag og heldur upp á það með tónleikum í Valhöll.

Jóhanna skoðar vegsummerki eftir eldsvoðann

Jóhanna Sigurðardóttir, forsætisráðherra, kom til Þingvalla í dag til að skoða vegsummerki eftir brunann í gær en ekki stendur steinn yfir steini af hinu fornfræga Hótel Valhöll. Slökkvilið og vinnuvélar vinna nú við að rífa niður þá veggi sem enn standa uppi og er brak úr húsinu flutt á brott jafnóðum. Rætt verður við Jóhönnu í kvöldfréttum Stöðvar 2.

Valhöll brennur - loftmyndir

Nú síðdegis brann hin sögufræga bygging Hótel Valhöll og er nú rústir einar. Arnþór Birkisson, ljósmyndari Vísis og Fréttablaðsins, var á staðnum og náði mögnuðum myndum sem sjá má í albúmi hér fyrir neðan sem ber heitið „Valhöll". Einnig má sjá stórkostlegar loftmyndir í albúminu „Valhöll - Loftmyndir" en þær eru teknar af Ingólfi Helga Tryggvasyni, einkaflugmanni sem átti leið hjá Þingvöllum í dag.

Sprengihætta í Valhöll

Lögregla og Slökkvilið vilja koma á framfæri þeim boðum til almennings að halda sig í góðri fjarlægð frá eldstaðnum á Þingvöllum vegna sprengihættu. Á það við umferð á landi sem og úr lofti.

Brunabjalla fór tvisvar í gang áður en brugðist var við

Kristján Gunnarsson ákvað að bregða sér í huggulegan hádegisverð í Valhöll í dag ásamt konu sinni og erlendum vinum þeirra. Þegar aðalrétturinn hafði runnið niður byrjuðu eldvarnarbjöllurnar að hringja.

Vinnuvélar brutu niður það sem eftir stóð af Valhöll

Starfsfólk á Hótel Valhöll á Þingvöllum leitaði lengi að eldi í húsinu eftir að brunabjöllur hringdu þrisvar sinnum í gærdag. Meðal annars fór það upp á þak hótelsins til þess að leita að hita. Svo blossaði eldurinn skyndilega upp og húsið var alelda þegar slökkvilið kom á vettvang. Húsið brann til kaldra kola. Talið er víst að kviknað hafi í þegar verið var að grilla í eldhúsinu fyrir samkvæmi sem átti að halda um kvöldið.

Eldur í Valhöll á Þingvöllum

Eldur braust út í Valhöll á Þingvöllum nú fyrir stundu. Slökkviliðið á höfuðborgarsvæðinu er á leiðinni á staðinn en ekki fengust nánari upplýsingar um málið.

Mest lesið


Fleiri fréttir

Sjá meira


×

Mest lesið