Benitez vill vinna alla leikina sem eftir eru

Rafael Benitez, stjóri Liverpool, vill að sínir menn vinni alla þá átta leiki sem liðið á eftir í ensku úrvalsdeildinni á þessu tímabili.

Liverpool vann 5-0 sigur á Aston Villa í gær og minnkaði mun Manchester United á toppi deildarinnar í eitt stig. United á þó leik til góða.

„Hvað titilbaráttuna varðar verðum við að sjá til þess að við vinnum okkar vinnu. Við megum ekki hafa áhyggjur af frammistöðu United og úrslitum þeirra leikja."

„Ef United gerir mistök verðum við að vera tilbúnir. Það þýðir að halda okkar striki og safna stigum."

„Við höfum verið að spila vel. Við eigum átta leiki eftir og við verðum að fara í þá alla eins og um bikarúrslitaleik væri að ræða."