Móðir og tengdamóðir John Terry teknar fyrir búðarþjófnað

Sue Terry, móðir John Terry, fyrirliða Chelsea, og Sue Poole, tengdamóðir hans, urðu honum til mikillar skammar þegar þær voru teknar fyrir búðarþjófnað á dögunum.

Stöllurnar rændu mat og fötum úr Marks & Spencer sem og Tesco. Verðmæti góssins er talið vera um 140 þúsund krónur. Þær voru gripnar af lögreglunni en játuðu glæp sinn og var þar með sleppt samstundis.

Málið er allt hið versta fyrir hin moldríka Terry. Tesco er opinber styrktaraðili enska knattspyrnusambandsins og Marks & Spencer sér enska landsliðinu fyrir jakkafötum.

Þetta uppátæki kvennanna vekur mikla undrun enda lifa þær báðar í vellystingum þökk sé Terry sem fær milljónir í vikulaun.

Hann keypti meðal annars hús handa þeim báðum. Búa þær við hlið hvor annarrar. Terry sjálfur býr í sömu götu sem er iðulega nefnd „Terry Street".