Pabbi hættir á næsta ári

Darren Ferguson segir að faðir sinn, Sir Alex, gæti hætt starfi sínu sem knattspyrnustjóri Manchester United í lok næsta tímabils.

Alex Ferguson hefur verið stjóri United síðan 1986 og unnið tíu meistaratitla í Englandi með liði sínu. Hann vantar einn titil í viðbót til að jafna árangur Liverpool og telja margir að hann vilji ekki hætta fyrr en honum tekst það.

„Hann er heilsuhraustur og er að byggja upp nýtt lið," sagði Darren, sonur hans, sem er knattspyrnustjóri Peterbrough. „Ef United verður meistari í vor verður félagið búið að jafna met Liverpool."

„Ég sé fyrir mér að hann gæti sinnt þessu starfi áfram á þessu tímabili og því næsta. Þá gæti hann ákveðið að segja þetta gott."