Aðgerðir öfgahóps gætu stuðlað að dreifingu erfðabreytts byggs

„Það sem þeir gera þarna, og hvernig þeir skilja við reitinn, er nákvæmlega það sem okkur ber ekki að gera" segir Björn Lárus Örvar, framkvæmdastjóri ORF Líftækni, um öfgahóp sem olli stórskemmdum á tilraunaræktun fyrirtækisins í Gunnarsholti.

Hópurinn, sem kennir sig við Illgresi, réðst gegn ræktun ORF á erfðabreyttu byggi, meðal annars vegna þeirrar hættu sem hópurinn vill meina að umhverfinu og dýrum stafi af slíkum tilraunum.

Hluti hættunnar sem almennt er talin stafa af erfðabreyttri ræktun er sú að erfðabreyttar plöntur dreifi sér um náttúruna. Því er leyfi ORF til ræktunarinnar bundið þeim skilyrðum að byggið sé einangrað, meðal annars með sérstakri aðgæslu við sáningu, skýli fyrir fuglum, hafravarðbelti umhverfis byggreitinn og hreinlæti við meðferð verkfæra.

Slíkri aðgæslu var ekki fyrir að fara við vinnubrögð Illgresis að sögn sérfræðinga.

„Ef þeir hafa áhyggjur af náttúrunni og að þetta sé ekki nógu afmarkað ættu þeir ekki að ganga um eins og þeir gerðu," segir Björn. Hann telur hópinn ekki hafa haft mikla þekkingu á því sem hann var að gera, enda tætti hann upp hafravarðbeltið umhverfis reitinn rétt eins og erfðabreytta byggið.

Jónatan Hermannsson, lektor við Landbúnaðarháskólann, tekur undir að þarna hafi verið óvarlega gengið um og telur aðgerðirnar bera þversögn í skoðunum hópsins vitni.