Blaðamenn mótmæla afskiptum stjórnvalda

Um 200 írakskir blaðamenn, rithöfundar og útgefendur mótmæltu í dag vaxandi ríkisafskiptum af starfi þeirra. Sumir blaðamannanna segja að lögsóknum á hendur þeim sem rannsaka öryggismál og spillingu hafi fjölgað, að því er fréttastofa breska ríkisútvarpsins greinir frá.

Mótmælin koma í kjölfar þess að reglur um ritskoðun bóka og bann á vefsíður voru kynntar. Yfirvöld segjast þó eingöngu loka fyrir vefsíður sem innihalda klámfengið efni eða hvetja til ofbeldis eða glæpa.

Mótmælin fóru fram við rótgróinn bókamarkað í Bagdad, en blaðamennirnir héldu á skiltum sem á stóð „Ekki drepa sannleikann" og „Já við frelsi. Nei við þöggun á blaðamönnum."

Síðan Saddam Hussein var hrakinn frá völdum hafa þarlendir fjölmiðlar blómstrað, en nú telja þeir hinu nýfundna frelsi sínu ógnað.

Að minnsta kosti 190 fjölmiðlamenn hafa látið lífið í Írak síðan Bandaríkjamenn réðust inn í landið árið 2003.