Beckham hjá Milan út leiktíðina

Samkvæmt heimildum fréttastofu Sky Sports hefur LA Galaxy gefið grænt ljós á að David Beckham verði hjá AC Milan út leiktíðina á Ítalíu.

Beckham hefur ítrekað lýst yfir vilja sínum að vera áfram á Ítalíu en samningaviðræður hafa staðið á milli félaganna í dágóðan tíma.

Samkvæmt frétt Sky Sports snýr Beckham svo aftur til Bandaríkjanna í byrjun júní og spilar með LA Galaxy á seinni hluta tímabilsins í Bandaríkjunum.

Upphaflega átti lánssamningur hans að renna út 9. mars næstkomandi. En Beckham hefur staðið sig vel hjá AC Milan og hafa forráðamenn liðsins ólmir viljað halda honum.