Davis ætlar að bíða með að skrifa undir

Sean Davis, leikmaður Portsmouth, ætlar að bíða þar til í lok tímabilsins með að ákveða hvort muni skrifa undir nýjan þriggja ára samning sem honum stendur til boða.

Núverandi samningur Davis rennur út í sumar og hefur hann áður verið orðaður við Celtic í Skotlandi. Þá gerði Bolton tilboð í hann í janúar en því var hafnað.

„Við buðum honum góðan samning með bættum kjörum," sagði Peter Storrie, framkvæmdarstjóri Portsmouth. „En ég held að hann vilji bíða til loka tímabilsins og sjá hvaða kostir standa honum til boða. Við viljum halda honum en þetta er undir honum sjálfum komið."