Faðir íslensks drengs verður sendur til Íraks - óttast um líf sitt

Barnsfaðir íslenskrar konu var á meðal þeirra nítján Íraka sem handteknir voru í kirkju á Norðurbrú í Kaupmannahöfn í nótt. Hann óttast að verða sendur til Íraks. Hann saknar sonar síns og vill búa á Íslandi.

Búið var að vísa hinum nítján aðilum sem handteknir voru úr landi. Mikil mótmæli upphófust í kjölfar handtökunnar og kom til átaka milli lögreglunnar í Kaupmannahöfn og mótmælenda. Endaði það með því að fimm voru handteknir. Einn hinn handteknu er Ali Nayef. Ali er fæddur í Írak en hefur búið í Danmörku síðastliðin sjö ár. Í fjögur þessara ára bjó hann með íslenskri konu og á með henni einn son. Þau hafa nú slitið samvistum og býr barnsmóðir Ali á Íslandi ásamt syninum.

„Þeir vilja senda mig tíl Íraks. Þar á ég engan að, hvorki fjölskyldu né vini," segir Ali sem er í ofanálag dauðhræddur við að snúa aftur til föðurlandsins. „Ég verð drepinn ef ég fer þangað. Auðvitað er ég hræddur."

Ali kynntist íslenskri barnsmóður sinni í Danmörku. Hún flutti að hans sögn til Íslands eftir að útlendingaeftirlitið í Danmörku fór að hóta honum að hann yrði sendur heim til Íraks. „Ég hef ekki séð son minn í eitt og háflt ár," segir Ali sem ræðir þó reglulega við hann í síma og á internetinu.

Ali heldur nú til í íbúð vinar síns. Hann veit ekki hver næstu skref danskra yfirvalda verða. Sjálfur vill hann fara til Íslands og búa þar. „Ég vil búa á Íslandi. Ég hef tvisvar farið í íslenska sendiráðið og beðið um að fá hæli á Íslandi. Þar fékk ég þau svör að hjálpin þyrfti að berast frá Íslandi."

Hann langar að vera hjá syni sínum. „Ég vil horfa á son minn, ég vil faðma son minn, ég vil kyssa son minn," segir Ali örvæntingarfullur.