Ballack óánægður með stuðningsmenn Þjóðverja

Michael Ballack var óánægður með að stuðningsmenn þýska landsliðsins blístruðu í lok leiks Þýskalands og Finnnlands í undankeppni HM 2010 í gær.

Þjóðverjar voru heppnir að sleppa með 1-1 jafntefli í leiknum en Lukas Podolski skoraði jöfnunarmark liðsins í blálokin. Þjóðverjar voru þó þegar búnir að tryggja sér þátttökurétt á HM í Suður-Afríku á næsta ári.

„Ég bara skil ekki af hverju þeir blístruðu," sagði Ballack. „Við spiluðum vissulega ekki vel en þetta átti liðið ekki skilið eftir góða frammistöðu í undankeppninni."

„Framkoma stuðningsmannanna olli okkur öllum vonbrigðum. Ég átti von á betra frá þeim."